Durante un episode di No Filter In Paradise (7 november 2024) mi a papia tocante ‘misplaced votes’ na Aruba. Mi a remarca cu resultado di eleccion a yeg'i desvia 30% for di con pueblo a vota. Den otro palabra, e reparticion di e 21 asientonan a desvia 30% for di e reparticion di e votonan entre partido. Votonan a bay pa Partido X, pero segun e sistema di parti restzetels, e votonan a resulta den un of mas asiento pa Partido Z. Na aña 2005 e desviacion tawata 30%. Resultado di eleccion 2024 ta pio: e reparticion di asiento ta desvia 36% for di con pueblo a vota.
Aruba su sistema electoral ta basa riba proporcionalidad. Si un partido haya 35% di e votonan, bo lo kier pa e partido haya alrededor di 35% di e asientonan. Y sigur bo no lo kier pa un cantidad halto di votonan valido ‘bay perdi’, pues no ta representa den e asientonan. Ta practicamente imposibel pa e reparticion di asiento no desvia for di e reparticion di voto, pero ta posibel pa minimalisa e desviacion na un nivel responsabel. Actualmente, e nivel di desviacion no ta responsabel. Esaki ta algun cifra di e resultado di eleccion 2024:
- AVP a haya 32.2% di e votonan valido, pero 42.9% di e asientonan.
- MEP a haya 31.7% di e votonan valido, pero 38.1% di e asientonan.
- AVP y MEP hunto a logra 63.9% di e votonan valido, pero a haya 81% di e asientonan.
- Un combinacion di AVP y Futuro ta representa 45.5% di e votonan valido, pero 57.1% di e asientonan (mayoria ficticio).
- Un combinacion di MEP y Futuro ta representa 44.9% di e votonan valido, pero 52.4% di e asientonan (mayoria ficticio).
Pa tur claridad, e resultadonan aki ta segun ley vigente y mi no ta insinua cu e partidonan a comete fraude electoral. No ta e partidonan ta e problema. E sistema ta e problema. E tipo di resultadonan aki ta nada nobo pa Aruba. Loke si mi no ta haya corecto, ta pa mantene un sistema intacto, sabiendo cu e sistema no ta produci resultadonan cu ta refleha debidamente con pueblo a vota.
Desde juni 2017 mi a scirbi tocante e fayonan di nos sistema di parti restzetels. Mi a concipia un ley pa introduci un sistema diferente pa parti restzetels, cu obhetivamente ta produci resultadonan cu ta un miho refleho di con pueblo a vota. E proposicion ta pa cambia e formula pa reparti restzetels (grootste overschotten na luga di grootste gemiddelden), baha e kiesdrempel (75% di e kiesdeler) y algun regla adicional pa preveni mayorianan ficticio y minorianan ficticio. Abou por mira ki resultado e sistema nobo lo a produci pa eleccion 2024, y con e sistema nobo structuralmente ta produci resultadonan cu ta desvia menos for di con pueblo a vota:
Despues di a colabora riba e proyecto aki cu (e tempo ey) parlamentaria sra. Misha Raymond, sra. Raymond a entrega e ley como ley di iniciativa. E ley a haya su conseho di Raad van Advies, y e reaccion riba e conseho (nader rapport), hunto cu e ley y su memorie van toelichting, a wordo entrega na Parlamento. Pues e ley ta cla pa wordo trata door di e constelacion nobo den Parlamento. Loke falta ta preguntanan por escrito (verslag), contestacion por escrito (nota naar aanleiding van het verslag), pa despues e ley wordo trata den un reunion publico.
Cu boluntad, eleccion 2024 lo ta e ultimo eleccion na Aruba cu e sistema actual di parti restzetels, cu ta fayando nos pa decadanan. E ta un sistema cu structuralmente no ta produci resultadonan di eleccion cu ta un refleho debido di con pueblo a vota. Aruba por miho. Mientrastanto tin un alternativa riba mesa cu obhetivamente ta produci resultadonan cu ta cuadra miho cu con pueblo ta vota, y ta percura pa menos voto keda sin wordo representa den Parlamento. E proposicion ta na Parlamento y ta cla pa wordo trata. Mi ta dispuesto pa asisti parlamentarionan den cada paso cu falta den tratamento di e proyecto di ley.
