E peliger di ta den un relacion cu un narcista

Abo ta den un relacion cu un narcista? Of kisas abo mes ta un narcista? Den e articulo aki Love Coach Desiree Swaen ta splica kico narcismo ta, y ta adverti pa e peliger di ta den un relacion cu un narcista. Desiree tambe ta splica si couples coaching cu un narcista ta bal bo placa y tempo. 


Den mitologia Griego, Narcissus tawata conoci pa su atraccion fisico. El a enamora su mes di su propio refleho den un plas di awa y door di tanto admira su refleho, a comberti su mes den un flor, cu a wordo yama 'narcissus'. Di eynan a bin e palabra 'narcismo', cu ta nifica: busca gratificacion a traves di vanidad y admiracion exagera di atributonan propio. Den palabra chikito, un narcista ta un persona cu ta sufri di admiracion propio exagera. Un persona sumamente egoista, arogante y no-empatico pa cu sentimientonan di otronan. En corto, e persona aki ta haya cu e ta digno di admiracion y respet, pero ta completamente incapaz di demostra esaki na otronan, ya cu e no ta mira motibo pa cual e mester haci esaki. Pa e persona aki, otro hendenan no ta existi, sino solamente pa admire y pa cumpli cu tur su caprichonan y deseonan, pasobra after all, ta e ta e centro di mundo. Abo conose un persona asina? Y what if, abo ta un persona asina? Mi ta sigur cu bo no lo ripara mes.

E narcista generalmente tin un opinion sumamente bon di su mes y no ta mira ningun problema, ni cu su mes, ni cu su actuacion. Esaki ta e motibo principal pakico terapia psicologico pa personanan cu ta sufri di locual American Psychiatric Association ta considera como 'narcissistic personality disorder' masha poco ta duna bon fruto, ya cu e narcista no ta mira dicon e mester di ayudo.
Parehanan di personanan narcista generalmente ta haya nan mes exponi na control, rebaho y abuso. E narcista ta busca e pareha perfecto pa e por manipula na su antoho y pa e sinti su mes admira y balora. Es decir, cu generalmente personanan cu tin necesidad constante pa 'please' otronan y sinti nan mes util, lo cay mas lihe pa e narcista, cu ta hunga su rol bon, lagando e persona aki sinti aprecia y balora na comienso di e relacion pa despues kita su mascara y show su 'true self'. E persona cu ta cay pa e narcista generalmente tin e tendencia di ta co-dependiente. Mientras cu e narcista ta maluza e victima, e ultimo ta depende di e narcista pa e gratificacion propio cu e ta haya door di sinti su mes util. Un relacion cu un narcista ta un 'recipe for disaster' y por ta sumamente destructivo pa e victima, si esaki no lanta for di soño na tempo. E victima lo biba un bida di sufrimento, pensando cu nunca e lo ta 'good enough' y cu nada cu e haci lo ta suficiente pa complace e persona aki. Mientrastanto, e narcista ta manipula y pone presion constante riba e victima, causando stress, tristeza y disgusto cu por resulta den problemanan psicologico.

Si bo ta sospecha cu bo ta den un relacion cu un narcista, pone atencion na bo sentimentonan: Bo ta feliz? Bo ta sinti’bo berdaderamente aprecia y balora? Bira consciente di bo actonan, ripara si bo ta sacrificando bo mes pa e persona ey, y puntra bo mes kico ta bo necesidad pa haci esey. E narcista, di su banda, generalmente no ta wak nada fout den su actuacion y por lo tanto, no lo ta habri pa cambio. Pa e motibo ey, couples coaching cu un narcista lo ta un 'waste of time and money'. Pa e narcista ta hopi facil pa 'move on' y busca un otro victima cu si por cumpli cu su exigencianan. Unico cos cu lo por yudabo supera un relacion cu un narcista, ta un personal coaching den self-love, self-esteem y principalmente, den 'letting go'.

Klik AKI pa lesa parti II di 'E peliger di ta den un relacion cu un narcista'.